Gidawat sa delegasyon sa Camiguin ang hagit sa “lubog” nga suplay sa tubig sa ilang billeting quarter sa San Jose Elementary School samtang pormal nga pagasug-dan ang Northern Mindanao Regional Athletic Association (NMRAA) 2026 karong adlawa.
Sa pakighinabi sa Bombo Radyo Malaybalay kay Arnel F. Maestrado, Division Sports Officer sa Camiguin, kesa nga magreklamo, mas gipili sa ilang grupo ang pagsabot sa sitwasyon isip pagpasalamat sa mainitong pagdawat sa host division.
Gipaneguro ni Maestrado nga luwas ang tibuok delegasyon human sa hapsay nga pag-abot sa Bukidnon ubos sa pag-escort sa kapulisan gikan sa Manolo Fortich. Mapasalamaton usab sila sa LGU Impasug-ong nga mi-welcome kanila pinaagi sa paghatag og mga tokens ug pagkaon.
Bisan pa man sa “school-based” lamang nga preparasyon tungod sa limitadong pondo, madasigon gihapon ang ilang mga atleta ug coaches nga makigbisog alang sa dungog sa Team CPPR (Camiguin).
Nagpabilin usab nga lig-on ang panglawas sa mga delegado ug wala’y naitalang nagsakit bisan pa sa mas bugnaw nga klima sa Malaybalay kon itandi sa naandan nila sa Camiguin. Ang NMRAA 2026 gidumala sa Division of Bukidnon isip host division karong tuiga.