Dili moubos sa 72 ka mga migrante ang namatay samtang liboan ang dungan nga midagsang ug misulay sa pagtabok padulong sa teritoryo sa Ceuta, usa ka exclave sa Spain sa Amihanang Aprika gikan sa Morocco.
Sumala sa mga awtoridad sa Spain, kadaghanan sa mga biktima nalunod samtang misulay sa paglangoy libot sa mga sea barrier ug utlanan aron makaabot sa teritoryo sa European Union (EU).
Padayon ang gipahigayong retrieval operations sa mga coast guard ug kapulisan sa kadagatan diin nakit-an ang mga bangkay sa mga biktima. Bisan pa man og kadaghanan sa mga midagsang mibalik na sa Morocco, nagpabilin ang dakong krisis sa seguridad sa maong dapit.
Tungod sa maong trahedya, nanawagan na ang gobyerno sa Spain og dinalian nga suporta ug pundo gikan sa European Union aron maatubang ang krisis sa seguridad ug pang-tawo (humanitarian response) sa utlanan.