Dili moubos sa 14 ka mga bata ang namatay ug lima pa ang nasamdan human naguba ug nahugno ang atop sa usa ka tutoring center sa Lahore, Pakistan, kagahapon, adlaw’ng Martes.
Sumala sa mga otoridad, lakip nusab ang usa ka magtutudlo ang nasamdan, samtang ang mga namatay nag-edad og 4 hangtod 12 anyos.
Duha ka tawo ang gidakop nga may kalabotan sa insidente, ug padayon ang imbestigasyon aron matino ang hinungdan sa trahedya.
Kabahin niini, mipadayag og pagbangutan si Pakistan Prime Minister Shehbaz Sharif sa mga pamilya sa mga biktima ug mimando sa paghatag og medikal nga tabang sa mga samdan ug patas nga imbestigasyon.
Matud sa mga otoridad, kasagaran nang mahitabo ang pagkahugno sa mga bilding sa Pakistan tungod sa huyang nga safety standards ug substandard nga mga materyales.