Gipadayag sa political analyst nga si Professor Arjan Aguirre nga posibleng maglisod pagkuha og igong suporta sa Senado ang impeachment complaint batok kang Vice President Sara Duterte kung kini mosaka na sa pormal nga impeachment trial.
Sumala ni Aguirre, bisan og lagmit nga makakuha og kadaghanan nga suporta sa House of Representatives ang maong reklamo, lahi ang dynamics sa Senado diin posible nga dili kini makakuha og parehas nga backing.
Gibanabana ni Aguirre nga 11 hangtod 12 ka senador ang posibleng mobotar pabor sa dismissal sa kaso, samtang adunay pipila ka miyembro sa majority bloc nga mahimo gihapon mopabor kang VP Sara Duterte, bisan og limitado lamang ang Duterte bloc o minority bloc sa Senado.
Dugang pa niini nga samtang nagpadayon ang imbestigasyon sa House Justice Committee ug nanggawas ang bag-ong impormasyon, posible pa nga mausab ang baruganan sa ubang mga senador.
Gituohan usab nga lahi ang mahimong pamaagi sa Senado ilalom sa 20th Congress itandi sa miaging liderato, ilabi na sa pagdumala sa impeachment proceedings.
Sa kasamtangan, posible nga ang kampo ni VP Sara Duterte maghulat na lang sa pag-uswag sa mga impeachment complaints sa Senado, tungod sa ilang pagtuo nga adunay igong kaalyado sa maong kapulungan.
Kahinumduman nga sa miaging impeachment complaints, naabtan og pila ka bulan sa Senado ang pag-aksyon niini ug ang uban hangtod karon naka-archive pa gihapon.