Gilauman sa kapulisan nga makatabang sa imbestigasyon ang ₱100,000 nga reward nga gitanyag sa pamilya ni Leon Bangot, 82 anyos, alang sa makahatag og kasaligan nga impormasyon nga makatudlo sa pagdakop sa suspek sa pagpatay niini niadtong Hulyo 21, 2026.
Sumala kang PCPT Linomer L. Caseres, hepe sa Cabanglasan Municipal Police Station, mahimong motibo sa mga saksi ug uban pang adunay nahibal-an sa insidente ang maong reward aron motaho sa kapolisan ug makatabang sa paspas nga pagsulbad sa kaso.
Gipahibalo na sa kapolisan ang reward pinaagi sa ilang Facebook page, samtang padayon pang gisusi ang nagkalain-laing posibleng motibo, lakip ang panaglalis sa yuta, personal nga kasuko, ug uban pang anggulo.
Nakaplagang patay si Bangot sulod sa iyang panimalay nga adunay samad sa dinunggaban. Nanawagan ang Cabanglasan MPS sa publiko nga ipahibalo sa kapolisan ang bisan unsang impormasyon kabahin sa kaso.
Gisaad usab niini ang pagpanalipod sa identidad ug pagkapribado sa mga impormante.