Gibatikos ni Senador Erwin Tulfo ang pagkondena sa Chinese Embassy sa mga pahayag sa pipila ka mga opisyal sa Pilipinas may kalabutan sa isyu sa West Philippine Sea.
Matud ni Tulfo, wala’y katungod ang Chinese Embassy nga sawayon ang mga opisyal sa nasud tungod sa ilang mga pahayag batok sa giingong pag-ilog sa China sa teritoryo sa Pilipinas.
Dugang pa niini, nga kung dili madawat sa mga opisyal sa embahada ang paagi sa paglihok sa demokrasya sa Pilipinas, mahimo silang molakaw bisan kanus-a.
Gipasiugda usab sa senador nga naa sa Konstitusyon sa Pilipinas ang freedom of speech ug angay kini respetohon sa mga langyaw.
Sumala ni Tulfo, walay susama nga kagawasan sa China diin ginapriso ang mga kritiko ug gipahilom ang media.
Nagsugod ang isyu human miingon ang Chinese Embassy Deputy Spokesperson nga si Guo Wei nga dili lisensya ang freedom of speech aron dauton ang lider sa laing nasud.
Gilakip usab niini ang usa ka internet post ni Philippine Coast Guard Spokesperson Commodore Jay Tarriela nga nagpakita og AI-generated video ni Chinese President Xi Jinping.
Gipunting usab ni Tulfo nga kung gusto sa mga opisyal sa China ang respeto sa mga Pilipino, kinahanglan una nilang respetohon ang Konstitusyon sa Pilipinas ug dawaton nga ang nasud dili nila gipanag-iyahan.