Gihagit ni House Committee on Public Accounts Chair ug Bicol Saro Partylist Rep. Terry Ridon si Vice President Sara Duterte nga personal nga moatubang sa impeachment proceedings sa Kamarabaha ug direkta nga tubagon ang mga alegasyon batok kaniya.
Sumala ni Ridon, ang pagdungog sa House Committee on Justice mao ang hustong forum aron mapanalipdan sa Bise Presidente ang iyang kaugalingon.
Giklaro niini nga dili pa kini pormal nga paglitis kondili usa pa lamang ka preliminary investigation aron masuta kung adunay igong basehan ang kaso sa dili pa kini dad-on sa Senado
Gipasiugda ni Ridon nga kini na ang higayon ni Duterte aron pamatud-an ang iyang giingong pagka-inosente ug ipresentar ang iyang bahin atubangan sa publiko.
Giawhag usab niini ang Bise Presidente nga ipadayag ang iyang katin-awan bahin sa confidential funds, kabtangan, ug uban pang isyu, imbis nga magsalig sa mga teknikal nga mosyon ug petisyon sa Supreme Court.
Dugang pa niini nga magpadayon ang proseso sa Kamarabaha sumala sa Konstitusyon bisan pa og dili motambong ang Bise Presidente.
Matud ni Ridon, ang Kamarabaha nagatuman lamang sa mandato niini nga susihon kung adunay igong basehan ang mga impeachment complaint ug kung angay ba kini ipadayon ngadto sa Senado.
Samtang nagpadayon ang paglikay sa Bise Presidente sa pag-atubang ug pagtubag sa mga alegasyon, nagkalig-on ang impresyon nga ang iyang depensa nagsalig sa delay ug teknikalidad, dili sa ebidensya.