Nakaplagan ang patay’ng lawas sa usa ka 35-anyos nga lalaki sulod sa bunkhouse sa mga tighimo og hollow blocks sa Purok 1, Brgy. San Carlos, Valencia City niadtong milabayng adlaw, takna alas 2:20 sa hapon.
Sumala sa taho, daling miresponde ang kapulisan human madawat ang report, ug pag-abot sa lugar nga nahitaboan nakita nga naka-lock ang pultahan gikan sa sulod samtang namaho na ang lugar, hinungdan nga gisudlan kini pinaagi sa pagtugot sa tag-iya diin ilang nadiskobrehan ang biktima nga naghigda ug anaa na sa state of decomposition.
Matud pa sa inisyal nga imbestigasyon, katapusang nakit-an nga buhi ang biktima niadtong Abril 6 ug sa pagkakaron walay nakitang timailhan sa foul play, apan padayon gihapon ang lawom nga imbestigasyon aron matino ang hinungdan sa kamatayon samtang ang patay’ng lawas gidala na sa Villanueva Funeral Homes alang sa dugang eksaminasyon.