Gipakita sa usa ka unibersidad sa Bukidnon ang tinuod nga inklusibong edukasyon pinaagi sa patas nga pagtan-aw ug pag-alagad sa mga estudyanteng adunay kapansanan.
Gihatagan og patas nga oportunidad ang Persons with Disability (PWD) nga estudyante sa Bukidnon State University (BukSU) pinaagi sa mga palisiya ug programang nagtan-aw sa ilang espesyal nga panginahanglan.
Sa pakighinabi sa Bombo Radyo Malaybalay, atol sa programang “Good Morning, Philippines”, usa ka estudyanteng PWD ang mipadayag sa iyang pasalamat sa mainit nga pagdawat ug pagpakita sa respeto kaniya isip kapareho sa uban. Matod pa niini, ang pagsabot ug pag-apil sa usa ka komunidad nga abri sa tanang klase sa estudyante, dako og epekto sa ilang emosyonal ug akademikong paglambo.
Bisan pa sa kalampusan sa inklusibong sistema, nagpabilin gihapon ang pipila ka hagit sama sa diskriminasyon ug personal nga insecurity, ilabina kon makita ang kalainan sa uban. Apan kini nakahatag og kadasig sa pagdawat sa kaugalingon ug sa pagsalig nga ang tanang estudyante may patas nga katungod sa kalampusan.