Giawhag sa usa ka Overseas Filipino Worker (OFW) nga taga-Manolo Fortich, Bukidnon, ang mga magtiayon nga paningkamotan ang pagtukod sa kaugalingong panimalay aron makat-on sa pagdumala sa panalapi ug pagdawat sa responsibilidad isip magtiayon.
Sa pakighinabi sa Bombo Radyo, gipadayag ni Diana Elizabeth Caare, usa ka lisensyadong magtutudlo nga nagtrabaho karon sa Vietnam, nga importante nga makat-on ang magtiayon sa paghimog desisyon ug pagdumala sa ilang panimalay nga independente sa ilang mga ginikanan.
Matod ni Caare, dili kini nagpasabot nga biyaan ang pamilya, tungod kay mahimo gihapong mopuyo una sa mga ginikanan ang magtiayon kon dili pa kaya sa ilang pinansyal nga kahimtang, basta adunay plano nga makatukod sa kaugalingong panimalay sa umaabot.
Gidugang niya nga mahimo usab malikayan ang panagbangi sa panalapi kon ang matag pamilya adunay kaugalingong badyet ug tin-aw nga pagdumala sa ilang mga gasto.