Makigdayalogo karong adlawa ang pamunuan sa Bukidnon Provincial Medical Center (BPMC) ngadto kanila ni Barangay Casisang Kapitan Gregorio Jaroy ug sa reklamanteng pasyente aron direktang husayon ang kontrobersiya sa giingong dili maayong pagtratar sa maong pasilidad.
Gipadayag ni BPMC Chief Dr. Miguel Antonio Prantilla nga nakig-alayon na kini sa kapitan aron mag-atubangay ang duha ka kampo sa BPMC ug masayran ang matuod nga nahitabo. Gipasabot sa doktor nga adunay nagkadaiyang bersyon sa insidente busa gikinahanglan ang saktong pagsabot ug pagsubay pinaagi sa hustong pamaagi ug referral system imbes nga ipaagi sa panaglalis sa social media. Gidugang usab niini nga dili angay basulon ang tibuok ospital ug ang tanang health worker tungod lamang sa reklamo batok sa usa ka kawani.
Samtang, taliwala sa maong isyu, gipanalipdan sa usa ka asawa sa pasyente nga si alyas “Lovelyn” ang dungog sa BPMC human kini nagpahayag sa iyang maayong kasinatian sa pag-atiman sa iyang bana sulod sa maong tambalanan.