Apektado karon ang ekonomiya sa lungsod sa Quezon, Bukidnon human nga maigo sa landslide ang dalan sa Palacapao nga nagkonektar sa probinsya paingon sa Davao ug ubang mga syudad.
Sa eksklusibong pakighinabi sa Bombo Radyo Malaybalay kay Mayor Pablo “Poling” Lorenzo III nga dako ang epekto niini sa duha ka produkto sa lungsod ang tubo ug pinya.
Matod pa sa Alkalde, ang mga produkto karon kinahanglan pang ipaagi sa Cotabato aron mahatod sa pipila ka mga lugar sa Mindanao hinungdan nga mas molungtad ang oras sa biyahe ug mas modako ang gasto.
Pinakaapektado niini ang produkto sa pinya, tungod kay sa taas nga oras sa biyahe, daghan sa mga ani ang madanyos pagabot sa destinasyon. Tungod niini, naapektuhan ang dagan sa lokal nga ekonomiya.
Apan sa bahin sa tubo, milawat si Mayor Lorenzo nga dili kaayo tanto dako ang epekto niini tungod kay hapit na magsugod ang harvest season.
Gilauman nga kini makatabang aron makabawi ang ekonomiya sa lungsod sa umaabot nga mga bulan.