Nagtuo ang Department of Foreign Affairs (DFA) nga dili makatabang sa maayo ug lig-on nga relasyon sa Pilipinas ug China ang pagdumili sa Beijing sa pagsulod sa mga opisyal sa Kalayaan, Palawan.
Gipahamtang sa China ang pagbawal sa 16 ka opisyal sa Kalayaan, lakip ang Hong Kong ug Macao, human ideklarar sa lokal nga gobyerno nga persona non grata ang Chinese Ambassador nga si Jing Quan tungod sa giingong paglapas sa diplomatic protocol ug panghilabot sa internal nga affairs sa Pilipinas.
Sumala sa DFA, bisan katungod sa usa ka nasud ang magpatuman og travel ban, dili kini makatabang sa pagpalig-on sa bilateral relations ug people-to-people exchanges nga gisaad sa duha ka nasud.
Ang Kalayaan maoy nag-inusarang munisipyo sa Pilipinas nga nahimutang sa West Philippine Sea.
Samtang padayon nga ginaangkon sa China ang halos tibuok kadagatan, bisan pa sa international ruling nga nagsulti nga walay legal nga basihanan ang ilang claim.
Sa mga miaging tuig, mitaas usab ang tensyon sa taliwala sa duha ka nasud tungod sa mga insidente sa dagat, lakip ang mga banggaan ug paggamit og water cannon batok sa mga barko sa mga Pilipino.