Dakong kawad-on alang sa New People’s Army (NPA) ang boluntaryong pagsurender sa duha ka miyembro sa maong grupo ug ang pagkakumpiska sa upat ka mga tag-as nga sa armas sa managlahing operasyon sa Bukidnon ug Surigao del Sur.
Ang maong mga rebelde mitahan ngadto sa 8th Infantry Battalion niadtong milabayng adlaw sa Impasug-ong dungan sa pagtugyan sa usa ka M16 rifle tungod sa grabeng presyur gikan sa militar.
Samtang niadtong Marso 13, narekober usab sa 30th Infantry Battalion ang tulo ka M16 rifles ug usa ka Colt M4 rifle uban ang mga bala niini sa Sitio Gis Anan, San Miguel, Surigao del Sur.
Matud ni Major General Michele B. Anayron Jr., Commander sa 4ID, kini nga mga kalampusan naghatag og dakong babag sa operasyonal nga katakus sa mga rebelde sa rehiyon.
Gipasiugdahan sa opisyal nga ang padayong pagkunhod sa pwersa sa walhong grupo timailhan sa kalampusan sa focused military operations sa kasundalohan.
Tungod niini, nagpabilin ang panawagan sa militar nga mubalik na sa sabakan sa balaod ang nahabiling mga sakop sa NPA aron makapanginabuhi og malinawon.
Ang maong mga nakuhang impormasyon ug armas dako og tabang sa nagpadayong tinguha sa gobyerno nga hingpit nang bungkagon ang nahabiling mga elemento sa rebelde sa maong mga dapit.
Gibutyag usab sa opisyal nga hapit na ideklarang insurgency free ang tibuok rehiyon sa higayon nga matultol na ang pipila ka nahibiling miyembro sa walhong grupo nga anaa pa sa mga kabukiran.
Sa pagkakron, nakipagnegosasyon na ang kasundaluhan sa mga opisyal sa nagkadiyang lugar sa rehiyon alang sa hingpit nga pagsumpo sa walhong pundok isip basehan sa tukmang deklarasyon sa kahimtang sa insurhensiya sa rehiyon diin mikagiw na matud pa sa mga lagyong dapit ang pipila sa mga armadong miyembro sa maong pundok.