Taliwala sa nagpadayong tensyon ug gubat sa Middle East, gipalapdan pa sa gobyerno ang pagpauli kon repatriation sa mga Filipino, diin 442 ka mga indibidwal gikan sa United Arab Emirates kon UAE ang luwas nga nakauli sa nasud.

Base sa report gikan sa Department of Migrant Workers kon DMW, usa ka chartered flight ang niabot sa Ninoy Aquino International Airport kon NAIA Terminal 3 kaniadtong Sabado sa hapon, diin kapin sa 200 sa mga sakay kay Overseas Filipino Workers o OFWs.

Sa usa ka pamahayag, gikumpirma ni DMW Secretary Hans Leo Cacdac ang malampuson nga pagbakwit o pagpauli sa mga Pinoy.

Ang sunod-sunod nga pagpauli nahitabo human ang Iran mibalos sa mga pag-atake sa missile ug drone batok sa mga nasud sa Gulf region diin ang US adunay mga base militar.

Kini nunot sa mga airstrike sa Estados Unidos ug Israel nga mipatay sa liderato sa Tehran.

Gikatahong gibanabana nga kapin sa 2.4 milyones ka Pilipino ang kasamtangang nagpuyo ug nagtrabaho sa Middle East.