Subling giklaro sa 4th Infantry Division Philippine Army nga ang presensya sa mga langyaw nga sundalo sa Cagayan de Oro kabahin lamang sa advance party alang sa final coordinating conference sa umaabot nga Balikatan Exercises.
Kini human mikalayp ang hungihong nga kagubot nga nagdala ug kabalaka sa mga lungsuranon.
Gipahayag ni Major General Michele Anayron Jr. Commander sa 4th Infantry Division Philippine Army, nga ang maong joint military exercise tali sa Pilipinas ug Estados Unidos sa kanhi Lumbia Airport regular nga aktibidad ug walay kalabotan sa nagpadayong tensyon sa Middle East.
Dugang pa sa opisyal nga ang presensya sa mga sundalong Amerikano sa Cagayan de Oro kabahin lamang sa logistical exercise alang sa Balikatan nga dugay nang naplano sukad pa sa miaging tuig.
Gipahayag niini nga ang maong mga aktibidad nagpunting sa pagbansay sa pagkarga ug pagdiskarga sa mga kagamitan isip kabahin sa transisyon sa Armed Forces of the Philippines gikan sa internal security ngadto sa external defense.
Nanawagan usab ang militar sa publiko nga dili angay mabalaka tungod ang maong joint exercise regular nga gihimo sa tibuok nasud ug karon lamang mas napokus sa Mindanao human sa pipila ka dekada nga pagpahigayon niini sa Luzon.
Hugot usab nga gipasabot niini nga ang maong kalihukan, nagtumong sa pagpalig-on sa kahanas sa mga sundalong Pilipino ug aron nga mas mapalambo pa ang kasinatian sa armadong kusog.