Padayon ang operasyon sa militar batok sa nahibiling mga miyembro sa New People’s Army sa kabukiran sa Bukidnon, ilabina sa boundary sa Agusan del Sur duol sa Umayam River.
Sumala sa BGen. Siegfred C. Tubalado- Commander of the 403rd Infantry Peacemaker Brigade Philippine Army, nga 12 na lamang ka rebelde ang ilang gilutos human adunay pipila ka miyembro nga misurender tungod sa kagutom ug kalisod sa pagtago sa kabukiran.
Lakip sa nahibiling lider ang giingong top rebel leader nga si Julia Cagadas alias “Ka Joca.”
Gipadayon sa militar ang panawagan sa mga rebelde nga manaog ug mosurender, diin andam ang gobyerno sa pagdawat kanila pinaagi sa Enhanced Comprehensive Local Integration Program o ECLIP nga naghatag og pinansyal nga tabang, livelihood support ug bayad alang sa mga armas nga isurender.
Samtang nagpadayon ang operasyon, matud sa militar nga dili pa ideklarar nga insurgency-free ang Bukidnon hangtod nga makumpirma nga wala na’y armadong grupo nga naglihok sa kabukiran.