Gipadayon karon sa Department of Public Works and Highways kon DPWH uban sa Department of Transportation kon DOTr ang plano sa pagpaayo sa kahimtang sa mga pedestrian pinaagi sa pagbutang og walkable infrastructure sa Epifanio de los Santos Avenue kon EDSA sa Metro Manila.
Tumong sa proyekto nga mapaluwas ug mapadali ang paglakaw sa mga commuter nga naggamit sa maong nag-unang dalan.
Sumala ni Vince Dizon, Secretary sa DPWH, kabahin kini sa mas halapad nga inisyatibo sa gobyerno aron unahon ang kaayohan sa mga commuter ug pedestrian sa mga dagkong kalsada.
Ang maong lakang ginahimo usab samtang giawhag ang publiko sa pagtipid sa konsumo sa gasolina, hilabi na sa nagpadayon nga tensyon sa Middle East nga adunay posibleng mas dako nga epekto sa presyo sa enerhiya sa kalibutan.
Lakip sa giandam nga mga lakang ang pagpalapad sa mga sidewalk, pagbutang og mga bike lane, ug pagpaayo sa pedestrian facilities sa EDSA aron mas mahimong accessible ug luwas alang sa mga naglakaw ug nagbisikleta.
Dugang pa sa Secretary nga kung magmalampuson ang maong proyekto sa EDSA, possible usab nga ipatuman ang susamang walkable infrastructure sa ubang dagkong dalan ug syudad sa nasud aron mapalambo ang kahimtang sa transportasyon ug pagbyahe sa publiko.