Gipadayag sa Palasyo Malacañang nga wala hisgoti ang nagpadayong panagbangi sa Middle East sa nahitabong panagpulong tali nila ni Presidente Ferdinand “Bongbong” Marcos Jr. ug sa US Defense Officials nga gipahigayon sa New York, America.
Matud ni Palace Press Officer ug Presidential Communications Office Undersecretary Claire Castro, ang panagtigom nagtutok sa pagpalig-on sa Philippines–United States Defense Partnership ug dili sa sitwasyon sa Middle East.
Dugang pa ni Castr, nga lakip sa gituki sa maong panagtigom mao ang gikatakda nga Balikatan exercises tali sa mga militar sa Pilipinas ug Estados Unidos, ingon man ang padayon nga pagpatuman sa Mutual Defense Treaty tali sa duha ka nasud.
Sa dihang gipangutana kung adunay bag-ong pasalig ang Estados Unidos kabahin sa suporta sa seguridad ngadto sa Pilipinas, miluwat si Castro nga ang Amerika nagpabilin sa pagpasalig sa pagpadayon ug pagpalig-on pa sa panagtambayayong sa depensa tali sa duha ka nasud ubos sa kasamtangang kasabutan.
Wala na usab magpaambit ang Malacañangug og dugang detalye sa ubang mga isyu nga gituki atol sa panagpulong.
Atol sa maong pagbisita, nakigtagbo si Presidente Marcos kang US Undersecretary of Defense for Policy Eldridge Colby ug sa delegasyon niini sa New York.
Gituki sa maong panagtagbo ang pagpalig-on sa kapabilidad sa duha ka nasud sa pagpugong sa mga hulga sa Indo-Pacific nga rehiyon, ingon man ang pagpalambo sa koordinasyon ug interoperability tali sa Armed Forces of the Philippines kon AFP ug militar sa Estados Unidos pinaagi sa joint operations.
Subling gipamatud-an sa duha ka nasud ang pasalig sa Mutual Defense Treaty ug padayon nga kooperasyon aron mapadayon ang kalinaw ug seguridad sa rehiyon sa Indo-Pacific.