Mitubag ang kapulisan sa usa ka insidente nga miresulta sa pagkapusil sa usa ka armadong suspek didto sa Crossing Dabong-dabong, Mailag, Valencia City, Bukidnon niadtong miaging adlaw, human kini misulong sa usa ka sibilyan ug sa mga pulis nga miresponde sa maong sitwasyon.
Base sa report sa mga otoridad, naglingkod sa iyang sidecar (o tricycle) ang 58-anyos nga biktima sa dihang kalit siyang giduolan sa 53-anyos nga suspek ug gisuwayan pagduslak gamit ang hait nga hinagiban, apan swerteng nakalikay ang biktima.
Namatikdan sa mga pulis nga naka-duty sa static post sa maong crossing ang panghitabo ug daling milihok aron pakalmahon ang suspek. Apan imbis maminaw, kalit hinuon silang gisulong niini. Tungod sa nagpadayong hulga, napugos ang usa ka pulis sa pagpabuto og kausa sa tiil sa suspek aron kini mapakgang.
Anaa na sa balay tambalanan ang biktima ug ang suspek alang sa medikal nga pagpaalim, diin pareho silang anaa na sa luwas nga kahimtang.