Padayon ang impresibong kampanya sa Filipina tennis star nga si Alexandra Eala sa prestihiyosong BNP Paribas Open sa Indian Wells Tennis Garden sa Indian Wells, California human kini nakaabot sa Round of 16 sa torneyo.
Ang sunod nga makasangka ni Eala mao ang Czech tennis player nga si Linda Nosková sa dula nga gikatakdang ipahigayon karong Marso 10 sa Estados Unidos kon mga alas-1 sa kaadlawon sa Marso 11, 2026 sa oras sa Pilipinas.
Ang makadaog sa maong dula mosulod sa quarterfinals sa usa sa pinakadakong torneyo sa women’s professional tennis nga sakop sa WTA 1000 series.
Kahinumdoman nga nakaabot si Eala sa Round of 16 human mapildi ang American star nga si Coco Gauff, nga napugos og undang sa dula tungod sa injury sa bukton samtang nag-una ang Filipina sa iskor nga 6-2, 2-0.
Tungod niini, nasiguro na ni Eala ang labing menos $105,720 o kapin kon kulang P6 milyon nga premyo.
Apan mas mudako pa kini kung magpadayon ang mga kadaogan, diin mahimong makadawat og mga $193,645 kung makaabot sa quarterfinals, kapin kon kulang $340,190 kung mosulod sa semifinals, gibanabanang anaa sa $612,340 kung mahimong runner-up, ug kapin sa $1.15 milyon o kapin kon kulang P68.1 milyon kung makadaog isip kampyon.