Gibutyag sa grupong Kontra Daya ug Vote Report PH nga ang nag-unang problema nga nasinati atol sa piniliay mao ang aberya sa automated counting machines (ACMs) ug uban pang mga teknikal nga kalisdanan nga nakaapekto sa dagan sa eleksyon.
Sumala sa Vote Report PH, adunay mga botante nga nahimutang sa mga presinto nga lisod ma-access, ilabina kadtong mga presinto nga anaa sa ikaduhang andana sa mga eskwelahan sa pipila ka lugar sa Metro Manila. Kini nakaapekto sa higayon sa pagbotar, ilabi na sa mga senior citizen ug persons with disabilities (PWD).
Gawas pa niini, daghang mga reklamo sab ang ilang nadawat gumikan sa delay sa pagboto tungod sab sa ACMs. Ang uban nga makina wala matud pa niandar ug nagkinahanglan pa nga i-reset, nga miresulta sa taas nga linya ug kasamok sa mga botante.
Gani, duna sab mga botante ang nagreklamo nga ang ilang pagbotar subay sa resibong giluwa sa ACMs puros ‘over vote’ bisan pa ngahusto ang ihap sa ilang gipiling kandidato ug maampingong gi-shade ang ilang balota.
Tungod niini, wala naihap ang ilang mga boto.