Giulan og batikos si Quezon City Representative Bong Suntay human sa kontrobersyal nga mga komento niini bahin sa aktres nga si Anne Curtis atol sa pagtuki sa ikatulo nga impeachment complaint batok kang Vice President Sara Duterte sa House Committee on Justice.
Matud ni Suntay, ang mga alegasyon sa sedisyon batok sa Bise Presidente tungod lamang sa pagtambong niini sa usa ka rally batok kang Presidente Ferdinand “Bongbong” Marcos Jr., diin gihulagway niini ang “imahinasyon” kon makakita kang Anne Curtis sa usa ka mall.
Gipasabot niini nga dili kini pwedeng papanubagon sa gihunahuna tungod anaa lamang kini sa iyang huna-huna ug wala sa lihok Tungod niini, daling mimando si San Juan Representative Maria Isabel Zamora, ang vice chairperson sa komite, nga tangtangon o i-strikeout ang maong pamahayag gikan sa opisyal nga rekord.
Bisan pa man sa pagbalibad ni Suntay ug pag-ingon nga wala’y malisya o sekswal nga buot ipasabot ang iyang gibutyag, gipahimangnoan kini ni Zamora nga dili angay ang maong mga pulong, ilabi na karon nga nagsugod na ang National Women’s Month.
Nagpabilin ang tensyon sa diskusyon sa dihang giklaro ni Suntay ang tumong niini mao ang pagpasabot nga dili pasabot nga adunay “desire” o tinguha sa usa ka butang, mahimo na kining “criminal act.”
Gidugang pa niini nga dili sayon-sayonon og “censor” ang mga pamahayag sa pagdungog tungod kay magtuo ang publiko nga kon unsay dili gusto sa komite, dali ra kining tangtangon sa rekord.
Sa laing bahin, pormal nang gidawat sa komite ang ikatulo nga impeachment complaint batok kang VP Duterte nga gisang-at sa pundok sa mga kaparian ug mga abogado.
Samtang ang una ug ikaduha nga reklamo natangtang na, ang ika-upat nga reklamo ni Atty. Nathaniel Cabrera—nga gi-indorso nila ni Manila Rep. Benny Abante ug Rep. Paulo Ortega—nagpabilin pa sa hurisdiksyon sa komite hangtod karon.