Usa ka dakong hulga ang nasud sa Iran tungod sa ilang nuclear program kini ang gibutyag ni Ray Talimio Jr., kanhi myembro sa Economic Development Committee sa RDC-X human sa nahitabong kagubot sa mga nasud sa middle east.
Gipasabot ni Talimio nga ang paspas nga kausaban sa teknolohiya ug ang tinguha sa Iran sa pagpalambo sa nuclear energy maoy nag-unang rason kon nganong seryoso ang pagtagad sa Israel ug Estados Unidos sa maong nasud. Matud niini, lahi ang Iran kon itandi sa China tungod kay ang China mas nakatutok sa “economic war” o ang pagkontrol sa ekonomiya sa ubang nasud pinaagi sa pagpautang.
Gidugang ni Talimio nga ang Iran usa ka Islamic revolutionary country nga adunay lahi nga tinuohan ug baruganan, hinungdan nga lisod kini kontrolon sa mga gamhanang nasud. Gihulagway usab niini ang kaagi sa Iraq kaniadto ubos ni Saddam Hussein, apan iyang namatikdan nga ang Iran karon aduna nay aktwal nga katakos sa pagpangatake gamit ang mga missiles ngadto sa mga kaalyado sa Estados Unidos sa Gulf States sama sa Bahrain, UAE, Qatar ug Saudi Arabia.
Bisan pa man sa kamatuoran nga adunahan ang maong mga nasod, gibutyag ni Talimio nga ang ilang militar nakatutok lamang sa pagpanalipod o pagsumpo sa mga missiles nga itira kanila. Gipahayag niini nga dili pa andam ang maong mga nasud sa usa ka long-term war.
Dugang pa niini nga ang pagbinayloay og mga missiles tali sa maong mga nasud makuyaw ug makadaot dili lang sa seguridad kon dili lakip sa ekonomiya sa tibuok kalibutan.