Giawhag sa senador ang mga embahada sa Pilipinas sa maong rehiyon nga ipatuman na ang crisis protocol alang sa gibanabanang duha ka milyon nga Overseas Filipino Workers (OFWs), lakip na ang kapin sa usa ka libo nga anaa sa Iran.
Nanawagan si Senador Francis “Kiko” Pangilinan sa kagamhanan nga molihok dayon aron masiguro ang kaluwasan sa mga Pilipino sa Middle East human sa mga pag-atake sa Amerika ug Israel batok sa Iran.
Matud pa ni Pangilinan, kinahanglang makig-alayon na ang mga opisyal sa mga community leader alang sa mas paspas ug hapsay nga evacuation o repatriation kon gikinahanglan.
Gawas sa seguridad sa mga Pinoy sa abroad, gihatagan usab og gibug-aton sa senador ang dinalian nga pagtubag sa posibleng pagsaka sa presyo sa krudo sa Pilipinas tungod sa maong tensyon.
Gisugyot ni Pangilinan ang paghatag og fuel subsidy alang sa mga drayber sa traysikol, jeep, ug bus, ingon man alang sa mga mag-uuma ug mangingisda nga nagsalig sa diesel sa ilang mga traktora ug sakayan.
Nanawagan usab kiini nga suspindihon ang excise tax sa diesel ug kerosene aron mamenosan ang palas-anon sa mga konsumedor samtang wala pa’y kasegurohan ang sitwasyon sa Middle East.