Sa usa ka talagsaong civil case sa China, gidapigan sa korte ang usa ka 10-anyos nga batang lalaki human niini kasuhan ang kaugalingong amahan tungod sa paglustay sa iyang savings nga walay pagtugot.
Ang bata giila si Xiaohui adunay natigom nga 80,000 yuan o (630,000 pesos) sa iyang bank account gikan sa mga “ang pao” nga nadawat matag Chinese New Year.
Sumala sa rekord sa korte, bulag na ang ginikanan niini ug ang bata anaa sa pag-atiman sa amahan.
Apan sa dihang nagminyo pag-usab ang amahan, gi-withdraw niini ang tanang kwarta sa account sa bata aron gamiton sa gasto sa kasal.
Nadiskubre kini sa tinuod nga inahan ni Xiaohui nga maoy nag-awhag sa bata nga bawi-on ang kwarta pinaagi sa legal nga paagi.
Sa depensa sa amahan, giingon niini nga siya ang legal guardian ug adunay katungod sa pagdumala sa kwarta hangtod sa mag-edad og sakto ang bata, apan gisalikway kini sa korte ug gideklarar nga personal nga kabtangan sa bata ang “gift money.”
Sa katapusang desisyon, gimando sa korte nga ibalik sa amahan ang kinatibuk-ang 82,750 yuan lakip na ang interes ngadto sa iyang anak.