Gipahibalo sa General Authority of Civil Aviation nga usa ka drone strike ang niigo sa Kuwait International Airport nga nakaresulta sa minor injuries sa pipila ka mga trabahante ug kadaut sa passenger building o Terminal 1 (T1) sa tugpahan.
Sumala sa pahayag sa tigpamaba sa ahensya nga si Abdullah Al-Rajhi, dali dayon gipahigayon sa mga ahensya ang emergency procedures aron aksyunan ang kadaut nga nadala sa pag-atake.
Tungod niini, dali usab nga naresolba ang insidente ug na-secure ang lugar, diin gisugdan na usab ang assessment operations subay sa safety protocols sa tugpahan.
Naghatag usab ang ahensya og dali nga medikal nga tabang sa mga nasamdan, nga nakasinati og minor injuries.
Sumala sa ulat, gisugdan na usab sa technical team ang ilang evaluation bahin sa lapad nga kadaut nga nadala sa drone strike ug sa operational procedures sa tugpahan aron masiguro ang padayon nga serbisyo.
Gipanghimatuud usab sa GACA nga kontrolado na sa mga awtoridad ang sitwasyon ug nagpabilin nga prayoridad ang kaluwasan sa mga pasahero ug empleyado sa tugpahan.
Gidugang pa sa ahensya nga magpagawas kini og dugang nga impormasyon sa dihang adunay makumpirmang detalye.