Gipatin-aw sa ekonomista nga si Jhon Louie B. Sabal nga bisan nag-una sa agrikultura ang Bukidnon, posible gihapon kini malakip sa top 26 nga pinakapobreng lalawigan tungod kay ang economic growth wala ma-convert ngadto sa tinuod nga development nga mabati sa katawhan.
Sa interbyu sa Bombo Radyo Malaybalay, giingon ni Sabal nga lahi ang “economic growth” sa “economic development.” Matod niya, mahimong dako ang produksyon sa agrikultura apan kon dili kini mabati sa ordinaryong lungsuranon, walay tinuod nga development ug magpabilin ang kapobrehon.
Gipasabot usab niya nga kasagaran income-based ang pagsukod sa kapobrehon pinaagi sa threshold nga gitakda sa Philippine Statistics Authority. Kon ubos sa gitakdang annual income ang usa ka pamilya, makonsidera silang pobre.
Apan, gi-awhag niya ang gobyerno nga gamiton ang Multidimensional Poverty Index nga naglakip dili lang sa income kundili usab sa edukasyon, kahimsog, ug kahimtang sa panginabuhi, subay sa mandato sa National Economic and Development Authority.
Sumala sa ekonomista, ang tinuod nga pagpakunhod sa kapobrehon magdepende sa epektibong paghubad sa economic growth ngadto sa inklusibong development aron mabati kini sa tanang sektor sa Bukidnon.