Kusganon nga gipanghimakak sa kampo sa mga biktima ang pamahayag ni Atty. Salvador Panelo nga nabungkag na matud pa ang teorya sa prosekusyon sa International Criminal Court hearing batok ni kanhi Presidente Rodrigo Duterte.
Matud sa abogado sa human rights lawyer Atty. Neri Colmenares, wala kini nakitang timailhan nga “shattered” ang kaso.
Hinuon, sigon niini, mas gipalig-on pa ang baruganan nga lig-on ang ebidensya sa prosekusyon ug huyang ang depensa.
Gisaway usab niini ang argumento nga ang mga pagpatay dili “widespread”.
Giinsistir ni Colmenares, nga sa mga kasong crimes against humanity, dili kinahanglan ang usa ka pormal nga panagpulong aron mapamatud-an ang usa ka common plan.
Sumala niini, nga dili katuohan nga ang libuan ka mga pagpamatay resulta lamang sa isolated ug random actions sa kapulisan.
Gisaway usab niini ang paghulagway sa depensa sa gidaghanon sa mga kaswalti nga “minimal”, nga gikaingon nga makadaot sa mga pamilya sa mga biktima.
Sa laing bahin, ang abogado ni Duterte nga si Nicholas Kaufman, miluwat nga “bizarre” ang alegasyong naglusad ang kanhi Presidente og halapad nga pag-atake batok sa populasyon.
Gipangutana usab niini kung angay ba usab nga imbestigahan si Presidente Ferdinand Marcos Jr., taliwala sa mga pamahayag nga nagpadayon ang vigilante killings bisan natapos na ang termino ni Duterte.
Samtang ang kampo sa mga biktima miinsister nga ang kaso wala’y politikanhong motibo, ug nga ang reklamo gisang-at kaniadtong 2018, sa wala pa si Marcos milingkod sa katungdanan, isip kabahin sa pagpangita og hustisya.