Kumpyansa si Nanette Castillo, inahan sa usa sa mga gikaingong biktima sa extrajudicial killings kon EJK, nga mapapanubag si kanhi Presidente Rodrigo Roa Duterte sa giatubang niini nga kasong crimes against humanity.
Sa nahimong pakighinabi sa Bombo Radyo kang Castillo, naglaom kini ug dako matud pa ang pagtuo sa pamilya niini nga kumpirmahon sa ICC Pre-Trial Chamber ang kaso ni Duterte aron hingpit na kining mahimong full trial ug mapanubag ang kanhi Presidente.
Kusganon usab nga gisaway ni Castillo ang mga pamahayag sa abogado sa depensa ni Duterte nga si Atty. Nicholas Kaufman.Â
Matud sa inahan sa biktima, pulos binuang ang gisulti sa abogado.
Dugang pa ni Castillo, nga nahimong DDS ang langyaw nga abogado nga nagpakabuta-bungol sa kamatuoran tungod sa pag-insistir sa paghulagway kang Duterte nga bayani.
Kahinumdoman nga ang anak niini nga si Aldrin, gipatay sa wala mailhing mga suspek kaniadtong Oktubre 3, 2017 sa dakbayan sa Manila.
Ang nasangpit nga insidente natala sa kataas sa dugoong war on drugs sa miaging administrasyon.
Dungan sa pag-uswag sa imbestigasyon sa ICC, ang pamilya Castillo nangayo og pag-ampo sa publiko alang sa pagkab-ot sa hustisya.