Gikwestiyon sa kampo ni kanhing Pangulong Rodrigo Duterte ang kamatuoran sa mga ebidensyang gipresentar sa prosekusyon, ilabina ang alegasyon nga widespread o systematic ang serye sa mga pagpatay sa Davao City.
Atol sa pagdungog, hugot nga gipanghimakak sa defense counsel ang mga akusasyon ug gipunting nga ang Count 1 sa kaso naglangkob lamang sa siyam ka insidente sa pagpatay sa usa ka lungsod.
Gitubag usab sa depensa ang pahayag sa representante sa prosekusyon nga si Ms. Robin Kraft nga nagkonekta sa usa ka quarry site isip giingong mass grave.
Sumala sa depensa, adunay igo nga panahon ug kahigayunan ang mga awtoridad sa Pilipinas sa paghimo og lawom nga imbestigasyon sukad nga nabalik ang judicial warrant, apan wala kini lig-on nga ebidensiya nga napagawas.
Matud sa kampo sa depensa nga ang giingong basihan sa prosekusyon mao lamang ang pahayag ni kanhing Senador Leila de Lima atol sa usa ka Senate Committee hearing.
Kini may kalabotan sa pagkakaplag sa pipila ka mga bukog nga posibleng gikan pa sa mga sundalong Hapones sa World War II, ug dili gikan sa mga biktima sa giingong extrajudicial killings.
Gikastigo usab sa abogado ang pahayag sa laing saksi nga nag-ingon nga adunay mga patay’ng lawas nga gilabay sa Davao Gulf, nga gihulagway sa depensa isip usa ka outlandish assertion o kadudahang alegasyon.
Giinsistir sa depensa nga bisan pa hukayon ang tibuok gulf, wala’y ebidensiyang mitumaw nga magpamatuod sa maong mga alegasyon.