Giklaro sa defense lawyer ni kanhing Presidente Rodrigo Duterte nga si Atty. Nicholas Kaufman nga ang “neutralization” sa police operations sa kampanya batok sa ilegal nga droga usa ka pamaagi sa pag-aresto ug dili kini nagpasabot og pagpatay.
Gihimo ni Kaufman ang maong pagpasabot isip tubag sa ebidensiyang gipresentar sa Prosekusyon nga gitawag og “PRRD list,” nga giingong “kill list” sa pipila ka media report. Sa maong lista, ang pipila ka high-value targets lakip si kanhing Albuera Mayor Rolando Espinosa Sr. ug Raul Yap, giila nga “neutralized” o giingong napatay.
Gipangatarungan ni Kaufman nga mismong testigo sa prosekusyon ang mipasabot nga ang “neutralization” sa police operations nagpasabot og pagdakop ug dili pagpatay.
Matod ni Kaufman , kini usa ka lawful restraint o legal nga pag-aresto o pagpugong sa kriminal ug dili awtomatikong pagpatay.
Gidugang pa nga sumala sa duha ka testigo, mahimo lamang gamiton ang lethal force kung ang suspek mosukol ug magbutang sa peligro sa kinabuhi sa pulis, subay sa ordinaryong doktrina sa self-defense.
Sa laing bahin, gipadayag kaniadto ni kanhing Philippine National Police chief ug karon Senador Ronald dela Rosa nga ang “neutralization” nagpasabot og pagdakop base sa PNP operational procedure manual.
Gipasabot usab sa depensa nga wala pa magpagawas og ruling ang Korte Suprema sa Pilipinas nga nagdeklarar sa drug war nga ilegal, ug wala usab gipawala ang bisa sa mga circular sa PNP nga naglangkob sa maong termino.
Apan sumala sa mga testigo sa prosekusyon sa ICC, sa konteksto sa Oplan Tokhang, ang “neutralize” nagpasabot og sugo sa pagpatay.