Gisupak sa kampo ni kanhi Presidente Rodrigo Duterte ang mga alegasyon sa prosecution sa nagpadayong confirmation of charges hearing sa International Criminal Court (ICC). Matud pa ni Atty. Proculo T. Sarmen, ang depensa nagbarog sa baruganan nga ang maong mga kaso politically motivated lamang ug walay lig-on nga basehan.
Gipasabot ni Atty. Sarmen nga dunay sayop nga interpretasyon sa mga pamahayag sa kanhi presidente sanglit ang iyang mga radio interviews ug speeches dili angay sabton nga dunay “criminal intent” sa pagpapatay og mga sibilyan. Lakip sa gihatagan og katin-awan sa abogado mao ang terminong “neutralize” nga anaa sa police manuals diin sa terminology sa Philippine National Police, kini nagpasabot lamang nga pugngan ang suspetsado sa pagsukol pinaagi sa pagdakop.
Giklaro ni Sarmen nga kini usa lamang ka operational term ug lahi ang gikinahanglan nga ebidensya sa lebel sa ICC kon itandi sa balaod sa Pilipinas. Sa ICC, kinahanglan pamatud-an sa depensa ang “lawful use of force” ug nga walay naglungtad nga “criminal policy” sa gobyerno, uban ang pag-analisar sa “command responsibility” o kung duna ba gyuy “effective control” ang kanhi presidente sa lihok sa mga kapulisan sa gubat batok droga.