Pormal nang giila sa prosecution team sa International Criminal Court (ICC) ang pipila ka mga tag-as ug kanhing opisyal sa Pilipinas isip mga “co-perpetrator” o kauban ni kanhi Presidente Rodrigo Duterte sa kontrobersyal nga giyera batok sa ilegal nga droga.
Sa pagpadayon sa confirmation of charges hearing, gipangalanan ni ICC Trial Lawyer Robynne Croft sila Senador Ronald “Bato” Dela Rosa, Senador Christopher “Bong” Go, ug kanhi Justice Secretary Vitaliano Aguirre II, ingon man ang kanhing PNP chiefs nga sila Vicente Danao, Camilo Cascolan, ug Oscar Albayalde; kanhing PDEA chief Isidro Lapeña; ug kanhing NBI director Dante Gierran.
Sumala sa mga piskal, ang maong lakang gituyo aron ipakita nga ang serye sa mga pagpamatay dili lamang personal nga desisyon sa kanhi presidente, kundili adunay koordinasyon ug direktang partisipasyon gikan sa iyang mga sinaligang opisyal.
Gawas niini, giakusahan usab sa prosecution si Duterte nga gigamit ang gitawag nga “Davao model” sa pagpatuman sa halapad nga pagpamatay sa nasud sa dihang milingkod na siya sa puwesto.
Gipadayag kini sa ikaduhang adlaw sa hearing kagahapong adlawa, diin giingon ni ICC Trial Lawyer Edward Jeremy nga gituman lamang sa kanhing pangulo ang iyang mga saad atol sa kampanya. Sa pagkakaron, gipaabot pa ang opisyal nga tubag sa mga nahisgutang indibidwal kabahin sa maong mga pasangil.