Usa ka talagsaon nga pagpakita sa kalig-on sa lawas ug huna-huna ang gipakita sa duha ka atleta gikan sa Michigan, U.S. human nila makab-ot ang Guinness World Record alang sa “longest marathon playing singles pickleball.”
Opisyal nga giila sa organisasyon si Brad Haverkamp ug Caleb Dang human sila walay hunong nga nagdula sulod sa 28 ka oras.
Nahitabo ang maong record-breaking attempt niadtong ulahing bahin sa Nobyembre 2025, apan karong bulana lang migawas ang opisyal nga kumpirmasyon human sa mabinantayong pagsusi sa mga ebidensya ug video footage sa Guinness.
Matod pa sa Guinness, gitugotan lang sila og lima ka minuto nga pahuway sa matag usa ka oras nga pagdula.
Gigamit sa duha ang maong mubo nga panahon aron dinalian nga mokaon, moinom, ug mogamit sa CR sa dili pa mobalik sa court.
Gihulagway ni Dang ang grabeng kalisod sa maong hagit, ilabi na sa tungatunga sa dula diin naminhod na ang iyang lawas ug huna-huna.
Matod pa niini, miabot ang higayon nga mapalong na ang utok sa tawo ug molihok na lang kini nga morag “autopilot” tungod sa grabehang kakapoy.