Gihisgotan karon sa parlamento sa Israel ang usa ka kontrobersyal nga balaodnon nga nagtumong sa pagpabalik sa silot nga kamatayon human sa pipila ka dekada nga paghunong niini.
Ang maong sugyot nga balaod nadasig human sa nahitabong pag-atake sa Hamas niadtong Oktubre 2023.
Ang maong lakang giatngan karon sa tibuok kalibutan, ilabi na nga ang kataposang higayon nga migamit ang Israel sa silot nga kamatayon niadtong tuig 1962 pa, sa pagsilot kang Adolf Eichmann nga usa ka lider sa Nazi.
Bisan pa man niini, nakadawat kini og pagsaway og komento gikan sa mga eksperto sa UN Human Rights Council ug uban pang mga kritiko.
Matod pa sa mga supak sa balaod, giisip kini nga diskriminasyon ug “racist” tungod kay gitumong lamang ang maong silot ngadto sa mga Palestinian nga mapamatud-an sa military courts, samtang walay labot ang mga Judio nga Israelita.
Dugang pa sa maong draft bill, wagtangon na usab ang kahigayonan alang sa pardon o commutation sa sentensya kon mapatuman na ang maong balaod.
Ang maong balaodnon pasado na  sa unang pagbasa sa Knesset niadtong Nobyembre 2025 ug gipaabot ang ikaduha ug ikatulo nga pagbasa sa dili pa kini hingpit nga mahimong balaod.
Gipahayag ni Itamar Ben Gvir, ang Minister of National Security, nga kini ang labing importanteng balaod sa kasaysayan sa Israel aron mahadlok ang mga terorista ug mapugngan ang pag-usab sa mga bayolenteng pag-atake.
Sa pagkakaron, wala pa’y klarong petsa kon kanus-a ang sunod nga deliberasyon alang sa maong kontrobersyal nga balaod.