Nakatala ang Bureau of Fire Protection sa Valencia City og lima (5) ka kaso sa sunog sukad pagsugod sa tuig 2026.
Matud ni FO1 Khelemar Aranco Jr., ang Public Information Officer sa BFP Valencia, duha sa maong mga sunog ang nahitabo niadtong bulan sa Enero, samtang tulo na ang natala karong bulan sa Pebrero.
Gipasabot ni Aranco nga kasagaran sa mga sunog nga nahitabo usa ka accidental in nature o aksidente lamang ug walay gituyo.
Matud ni FO1 Aranco Jr., ang lima ka kaso sa sunog sa Valencia City nahitabo sa Lumbo, Sugarland, Banlag, Tongan-tongan, ug Bagontaas.
Dugang pa niini, mas mikunhod ang ihap sa sunog karong tuiga tandi sa miaging tuig tungod sa kaepektibo sa ilang programang Oplan Ligtas Pamayanan kon (OLP).
Isip kabahin sa maong programa, ang BFP padayon nga naglibot sa mga barangay aron mang-apod-apod og mga pamphlets ug maghatag og pahimangno sa katawhan kon unsaon paglikay sa sunog.