Gikabalak-an sa sektor sa ekonomiya ang padayon nga pagdungog sa Confirmation of Charges batok kang kanhi presidente Rodrigo Duterte sa International Criminal Court (ICC), uban sa nagkadaiyang isyu nga naghatag og kawalay kasigurohan sa nasud.
Matud pa ni Ray Talimio Jr., kanhi presidente sa Oro Chamber, ang huyang nga estado sa politika, lakip na ang planong impeachment batok kang VP Sara ug ang mga alegasyon sa korapsyon sa flood control projects, adunay dakong epekto sa ekonomiya sa Pilipinas.
Tungod niini, nakita ang usa ka delikado nga kalihukan sa business sector diin ang mga foreign ug local investors nalangalan o “on hold” una sa ilang mga plano alang sa expansion ug pagbubo og bag-ong puhunan sa nasud.
Gipasabot niini nga mamahimomg mamobre na ang Pilipinas sanglit magpadayon ang pagdungog ug mamiligro ang ekonomiya sa nasud tungod sa pagkalangan sa mga turismong kalihukan ug kawalay pagsalig sa mga investors.
Dugang pa ni Ray Talimio Jr., walay kasigurohan nga mudapig ang International Criminal Court (ICC) kang kanhi Presidente Rodrigo Duterte bisan pa og giisip nga lig-on ang mga statement ug ebidensya sa defense sa kampo sa kanhi pangulo busa laumang maugwayan usab ang dagan sa ekonomiya sa nasud nunot niini.
Gidayeg ni Talimio ang abilidad sa abogado ni Duterte nga si Nicolas Kaufman, kinsa matud pa nakahimo sa pag-atake ug pagsumpo sa mga argumento sa prosekusyon.
Gibutyag niini nga base sa obserbasyon, ang mga pasangil batok sa kanhi presidente pulos lamang “rhetorics” o mga pulong nga walay igong basehan sa balaod.