Pormal nga gihangyo sa kampo ni kanhi Presidente Rodrigo Duterte ngadto sa mga mahistrado sa International Criminal Court (ICC) nga iuli na ang kanhi presidente sa mga Pilipino ug sa iyang pamilya.
Sa pag-atubang sa korte, gilatag ni defense counsel Nicholas Kaufman ang sunod nga mga lakang sa ilang grupo isip depensa sa kanhi pangulo.
Sa iyang pag-apelar sa korte, gitawag pa sa abogado si Duterte og “Tatay Digong” ug migamit sa lig-on nga panawagan nga: “Iuli siya sa iyang pamilya” (Give him back to his family).
Tumong sa maong manipestasyon nga ipaabot sa ICC ang sentimyento ug habig sa mga dumadapig ug pamilya sa kanhi presidente dinhi sa Pilipinas.
Kini nga lakang sa depensa nahitabo taliwala sa nagpadayon nga pagpaminaw ug paglatag sa mga ebidensya sa ICC kalabot sa gihimong imbestigasyon sa dugoong “drug war” sa miaging administrasyon.