Taliwala sa pagsugod sa confirmation of charges hearing sa International Criminal Court (ICC) batok kang kanhi Presidente Rodrigo Duterte, pormal nga gihangyo sa mga magbabalaod gikan sa oposisyon niining Lunes ang pagbalik sa nasud isip sakop sa maong tribunal.
Pinaagi sa House Resolution 809, nga gipasiugdahan nila ni Rep. Antonio Tinio (ACT Teachers), Rep. Sarah Elago (Gabriela), ug Rep. Renee Co (Kabataan), gitataw sa grupo nga ang pagbalik sa ICC makapakusog sa tulubagon (accountability) ug hustisya sa nasud.
Gipasabot sa mga representante nga nagsilbi nga “court of last resort” ang ICC kon mapakyas ang lokal nga sistema sa hustisya.
Dugang pa sa oposisyon, kini nga lakang makapabalik sa pagsalig sa tibuok kalibutan sa legal nga sistema sa Pilipinas ug maglig-on sa dungog sa nasud isip usa ka demokrasya nga nagrespeto sa tawhanong katungod.