Mukabat sa Php36,800.00 ang kinatibuk-ang kantidad sa smuggled nga sigarilyo ang nakumpiska sa kapulisan sa managlahing operasyon sa lungsod sa Dangcagan ug San Fernando, Bukidnon, nga miresulta usab sa pagkasikop sa duha ka suspetsado.
Sa lungsod sa San Fernando, nasikop ang usa ka 49-anyos nga lalaki sa Purok 5, Sacramento Valley, human makuha gikan kaniya ang 40 ka reams sa smuggled nga sigarilyo nga nagkantidad og Php32,000.00.
Sa pikas bahin, usa ka 32-anyos nga babaye ang nadakpan sa Purok 2A, Mac Arthur, Dangcagan, diin nakuhaan kini og unom ka reams nga nagkantidad og Php4,800.00.
Ang duha ka dinakpan gidala sa ilang tagsa-tagsa ka Municipal Police Station (MPS) alang sa saktong dokumentasyon. Ang tanang nakumpiskang kontrabando gitugyan na ngadto sa Municipal Health Office sa matag lungsod alang sa saktong disposisyon.