Gideklara ang suspensiyon sa face-to-face classes sa tanang pampubliko ug pribadong eskwelahan sa tanang lebel sa Valencia City karong adlawa Pebrero 23, 2026, human sa rekomendasyon sa City Disaster Risk Reduction and Management Office (CDRRMO) tungod sa padayon nga kusog nga ulan sugod pa alas 4:00 sa hapon niadtong Pebrero 22.
Kini subay sa datos nga gipagawas sa Philippine Atmospheric, Geophysical and Astronomical Services Administration (PAG-ASA) nga Heavy Rainfall Warning No. 2 (Yellow Warning) takna alas 8:00 sa kagabii.
Sumala sa monitoring alas 10:00 sa gabii, misaka sa Level 4 ang Lumbayao Dam samtang naka-Alert Level ang Kulaman River sa Dagat-Kidavao area ug Manupali River, hinungdan nga girekomendar ang pre-emptive evacuation sa mga lugar sa Maapag ug Catumbalon aron malikayan ang posibleng pagbaha ug landslide.
Sa laing bahin, gisuspenso usab ni Mayor Rogelio C. Yeke ang klase sa elementarya ug high school sa San Fernando tungod sa walay hunong nga ulan ug napa-report nga pagguho sa yuta, samtang gideklarang dili maagian ang dalan sa San Fernando–Talaingod–Tagum Road ug gitambagan ang tanang biyahero nga mogamit og alternatibong ruta hangtod sa sunod nga pahibalo.