Nakakumpiska ang Police Regional Office 10 og kapin ₱126 milyones nga kantidad sa iligal nga droga ug smuggled nga sigarilyo sulod sa unang 100 ka adlaw sa 2026 sa Northern Mindanao.
Sumala ni PBGen. Cristopher N. Abrahano – Regional Director-Police Regional Office-X, kapin ₱96 milyones niini ang gikan sa iligal nga droga nga nasakmit sa kapin 1,000 ka operasyon nga nagresulta sa pagdakop sa sobra 1,200 ka mga suspek nga napasakaan na og kaso.
Samtang kapin ₱30 milyones usab nga smuggled nga sigarilyo ang nasakmit sa nagkalain-laing checkpoint ug highway operations sa rehiyon. Gibutyag nga ginatago ang kontrabando sa lain-laing paagi lakip na sulod sa garbage truck ug ambulansya aron malikayan ang inspeksyon.
Gipadayag sa PRO-10 nga padayon nilang palig-onon ang kampanya batok sa iligal nga droga ug smuggling, inubanan sa koordinasyon sa mga lokal nga panggamhanan aron mapugngan ang economic sabotage ug maprotektahan ang kita sa gobyerno.