Padayon nga mamatikdan ang presensya sa mga sakyanan pandagat sa China sa kadagatan nga sakop sa Isla sa Pag-asa sa West Philippine Sea.
Sa gipahigayon nga maritime domain awareness flight sa Philippine Coast Guard (PCG) niadtong Sabado, Pebrero 21, natala ang dul-an sa 20 ka mga barko sa China nga naglawig duol sa maong isla.
Lakip sa mga namat-an mao ang 17 ka Chinese maritime militia vessels, duha ka barko sa China Coast Guard, ug usa ka barko gikan sa People’s Liberation Army-Navy.
Gawas niini, namatikdan usab sa PCG ang artificial island nga gitukod sa China sa Mischief o Panganiban Reef, nga nahimutang lamang og 130 nautical miles gikan sa lalawigan sa Palawan.
Ang padayon nga pagpangatubang sa mga barko sa China sa maong dapit nagpakita sa nagkagrabe nga tensyon sa territorial dispute sa West Philippine Sea, samtang ang Philippine Coast Guard nagpabiling mabinantayon sa pag-monitor sa bisan unsang ilegal nga aktibidad sulod sa exclusive economic zone sa nasod.