Gitugutan sa International Criminal Court (ICC) ang parehas nga hangyo sa kampo ni kanhing Pangulong Rodrigo Duterte ug sa prosekusyon nga makadugang pa og mga ebidensiya alang sa confirmation of charges hearing sa sunod semana.
Sa desisyong gipagawas niadtong Pebrero 20, gikonsiderar sa ICC Pre-Trial Chamber I ang ikaduhang request sa depensa nga makadugang og “items” sa ilang listahan sa ebidensiya, ingon man ang hangyo sa prosekusyon nga magdugang og 14 ka items sa ilang list of evidence.
Sa maong adlaw, gikompirma sa prosekusyon nga wala kini’y pagsupak sa pagdawat sa mga materyales nga nalista sa Annex A sa hangyo sa depensa, ug mihangyo usab kini sa Chamber nga dawaton ang 14 ka items sa ilang listahan sa ebidensiya, nga walay gisupak ang kampo sa depensa.
Gipasabot sa ICC Pre-Trial Chamber I nga adunay igo nga basihan aron aprobahan ang maong mga hangyo nga dili makahatag og undue prejudice o kadaot sa bisan unsang kampo.
Una na usab nga mipabor ang Chamber sa hangyo sa kanhing pangulo nga dili na motambong personal sa iyang confirmation of charges hearing sa sunod semana.