Ginatugis karon sa Bukidnon Police Provincial Office ang mga indibidwal nga nagpaluyo sa pagpanagtag ug pagbaligya sa smuggled nga sigarilyo sa lalawigan sa Bukidnon, samtang gipalig-on ang intelligence monitoring ug border checkpoints aron mapugngan ang maong ilegal na negosyo.
Sa pakighinabi sa Bombo Radyo Malaybalay kay PCpt. Sheila Joy P. Jangad, tigpamaba sa Bukidnon Police Provincial Office, padayon ang pag- tugis sa mga “dagkong isda” nga anaa sa likod sa ilegal nga negosyo, apan wala pa’y detalye nga mahimong ipagawas tungod kay ubos pa kini sa imbestigasyon sa Intelligence Unit.
Gipalig-on usab ang 24/7 checkpoint operations sa mga border control points sa probinsya aron masuta ug makompiska ang mga kontrabando nga sigarilyo nga mosulod o moagi sa Bukidnon. Nakigkoordinar usab ang kapulisan sa mga LGU, Local Health Units ug sa Bureau of Customs alang sa pagpasaka og kaso batok sa mga madakpan.