Mikunhod ang crime rate sa Rehiyon 10 diin gibana-banaang anaa sa kapin 20 porsyentos nga pag-ubos sa kriminalidad ang natala sa buhatan sa kapulisan.
Sa pakighinabi sa Bombo Radyo Malaybalay kang PBGen. Cristopher N. Abrahano, Regional Director sa Police Regional Office-X gisulti niini nga bisan pa sa padayong hagit sa ilegal nga droga ug uban pang kriminalidad, nagpadayon ang kapulisan sa pagpatuman og hugot nga mga operasyon aron mapreserbar ang kalinaw ug kahusay sa rehiyon.
Gidugang pa niini nga ang maong pagkunhod sa crime rate nahiuyon usab sa nasudnong average nga 21 porsyento nga pagbaba sa kriminalidad sa tibuok Pilipinas.
Subay sa maong pamhayag, gipahinumdoman niini ang kapulisan sa kamahinungdanon sa pagtuman sa rule of law ug pagtahod sa human rights.
Kini subay sa direktiba gikan sa Presidente ug sa Chief PNP PGEN. Jose Melencio Nartatez Jr.
Matud pa ni Abrahano, kinahanglan ipatuman ang balaod nga walay gikahadlokan o gidapigan.
Bisan pa man nga ang mga pulis adunay saktong kagamitan aron depensahan ang ilang kaugalingon, iyang gipasiugda nga ang matag usa adunay katungod nga mabuhi.
Gilauman nga ang tanang miyembro sa kapulisan mosunod sa operational procedures basta wala’y mosukol sa ilang mga operasyon.