Giangkon sa Department of Justice nga wala pa sila nag-andam o nagahimo og preparasyon sa posibleng pagsurrender sa mga co-perpetrators ni kanhing Presidente Rodrigo Duterte sa kaso nga giatubang sa International Criminal Court (ICC) sa The Hague, Netherlands.
Sumala kang Justice Spokesperson Atty. Polo Martinez, wala pay warrant of arrest nga gi-isyu batok sa mga opisyal nga gihisgutan, mao nga wala usab rason ang DOJ nga maghimo og aksyon sa pagkupot kanila.
Gipasiugda usab sa DOJ nga naghulat lang sila sa pinal nga resolusyon sa Korte Suprema nga mga petisyon may kalabotan sa kaso ni Duterte, ug kini ang magsilbing basehan sa ilang sunod nga aksyon kung mag-isyu na og warrant of arrest.
Ang mga giingong co-perpetrators naglakip kang Senador Bong Go, Senador Bato Dela Rosa, kanhing Justice Secretary Vitaliano Aguirre II, ug uban pang taas nga opisyal sa nakalabay nga administrasyon.
Ang kaso naglambigit sa alegasyon sa crimes against humanity tungod sa implementasyon sa “War on Drugs” sa panahon sa administrasyon ni Duterte.