Nagtapok ang grupo sa mga kababainhan sa St. Peter’s Basilica ug nagpagula og pink nga aso aron ipakita ang ilang pagkadismaya sa padayon nga pagdumili sa ilang pag-apil sa pagpangulo sa Simbahang Katoliko.
Matod ni Miriam Duignan gikan sa Wijngaards Institute, nga dili angay isalikway ang kababayen-an sa mga desisyon sa Simbahan tungod sila naglangkob sa halos katungang populasyon sa mga magtutuo sa Simbahang Katoliko.
Matod pa, sa wala pa mareporma ang Simbahan sa panahon sa medieval, ang mga kababayen-an adunay dakong papel sa simbahan.
Apan hangtod karon, wala gihapon matud pa tugoti nga maordinahan bisan pa nga daghan sa ilang ihap ang dunay taas nga kahibalo sa pastoral ug teolohikal nga pagtuon.
Bisan pa sa pipila ka lakang ni Pope Francis kaniadto sa paghatag og mas dako nga papel sa kababayen-an sa Simbahan, sama sa pagdapit kanila sa Synod ug pagtuon sa posibilidad sa pagka-diakonesa, nagpabilin nga sirado gihapon ang oportunidad alang sa mga babaye aron mahimong pari.
Dugang pa sa aktibista nga si Kate McElwee executive director sa Women’s Ordination Conference campaign group, ang kalibutan naghulat sa puti o itom nga aso, apan sila nagpagawas og rosas nga aso isip pagpakita sa paglaum sa umaabot nga dawaton sa simbahan ang mga babaye isip managsama.