Gipahibalo sa Sweden ang bag-ong regulasyon alang sa mga batan-on nga nag-edad og 13 anyos diin mahimo na silang makasinati sa tinuod nga kinabuhi sa prisohan kon mapamatud-ang sad-an sa mga krimen.
Gilauman nga ipatuman ang maong balaod karong Hulyo, apan nakadawat na kini og mga kritismo gikan sa nagkalain-laing sektor.
Sumala sa minority right-wing government, nga gisuportahan sa far right Sweden Democrats, gihimo kini nga lakang aron mapaubsan ang crime rates sa nasud, ilabi na sa mga batan-on nga nag-edad og 13 hangtod 15-anyos.
Bisan pa niini, kadaghanan sa 126 ka mga awtoridad nga gikonsulta sa gobyerno lakip na ang mga pulis sa bilanggoan supak sa maong kausaban.
Nasayran nga ang nasud sa Scandinavia nakasinati og kapin sa usa ka dekada nga pakigbatok sa nagkagrabe nga bayolenteng krimen, operasyon sa mga gang ug ilegal nga negosyo sa drugas.